პუმი წარმოშობით უნგრეთიდანაა და პირველად 1815 წელს მოიხსენიება. მას ასევე უნგრულ პუმის ეძახიან. ეს ჯიში რამოდენიმე ჯიშის შერევით წარმოიშვა. სავარაუდოდ, ესენი იყო: უნგრული ნაგაზი, ფრანგული და გერმანული მწყემსი ძაღლები, ასევე სხვადასხვა ტერიერი.
ევროპაში პუმი 1966 წლიდან გავრცელდა, როდესაც ჯიში საერთაშორისო კინოლოგიურმა ფედერაციამ აღიარა.
მიუხედავად იმისა, რომ პუმი აშშ-ში გასული საუკუნის 90-იან წლებში შეიყვანეს, ისე მოეწონათ ამერიკელებს, რომ მეორე
United Kennel Club-მა ის უკვე 1996 წელს აღიარა.
გარეგნობით პუმი სიმპატიური, საშუალო ზომის, ხუჭუჭბეწვიანი ძაღლია. ის ცოტათი პუდელს წააგავს, მაგრამ სინამდვილეში ეს სერიოზული მწყემსი ძაღლია. სწორედ მისი მუშა თვისებები აქცევს პუმის შესანიშნავ მოდარაჯე ძაღლად, რომელიც იცავს პატრონს, მის სახლსა და ქონებას.
პუმის ძალიან კარგი სმენა და ყნოსვა აქვს, საეჭვო ხმის ან სუნის შეგრძნების დროს დაუზარელად ყეფს. ისინი ხმამაღალი ყეფით გამოირჩევიან.
ჩვეულებრივ, პუმი კეთილი და მომთმენია ბავშვებთან ურთიერთობისას, განსაკუთრებით, როცა ისინი ერთად იზრდებიან. თუმცა, თუ პუმი არასწორადაა აღზრდილი, არაპროგნოზირებადი ხდება და შეუძლია აგრესიის გამოვლენა. სწორედ ამის გამო, მისი პატარა ბავშვებთან სიახლოვეს ყოლა არაა რეკომენდირებული.
პუმის ასევე შეუძლია მტრულად მოექცეს პატარა ზომის ცხოველებს, რადგან სხვა ტერიერების მსგავსად, შესანიშნავი ვირთხის მჭერია.
დღესდღეობით ამ ჯიშის წარმომადგენლები პოპულარულები არიან, როგორც კომპანიონი ძაღლები. ისინი პატრონი ოჯახისადმი დიდი ერთგულებითა და მიჯაჭვულობით გამოირჩევიან. ეს ჯიში ძალიან დამჯერია, ფხიზელი და არ არის ჯიუტი.
პუმის ძალიან ცოცხალი ტემპერამენტი აქვს, ამიტომ მისთვის აუცილებელია სეირნიბისას ბევრი სირბილი. ამ ცხოველებს სივრცე და თავისუფლება უყვართ. ისინი სიამოვნებით დარბიან პატრონთან ერთად, თუმცა, ასეთ დროს საჭიროა, პატრონს საბელი კარგად ეჭიროს.
პუმი ჭკვიანი ძაღლია, რომელიც ადვილად ითვისებს ბრძანებებს. მისი ბეწვი საშუალო სიგრძისაა, ხვეული. ფეხებზე ბეწვი მოკლე აქვს. მას სპეციალური სავარცხლით არც ისე ხშირი დავარცხნა სჭირდება. ბანაობაც იშვიათად სჭირდება.
პუმის ჯიშის ძაღლი ხშირად რუხი ფერისაა, ხან ვერცხლისფერი და გრაფიტის ფერია.
