ამ ჯიშის წარმოშობის ადგილია კანადის შტატი, ნიუფაუნდლენდი, სადაც მისი წინაპრები მეთევზეებს ეხმარებოდნენ მუშაობაში. შემდგომში მარხილის შესანიშნავი მზიდავები, წერილების დამტარებლები, და საერთოდ, კარგი მუშა ძაღლები გახდნენ. ლაბრადორების ერთ-ერთი თვისება, რასაც დღესაც ავლენენ, არის მზადყოფნა – წყალში შევარდეს. ამ ჯიშს წინაპრებისგან გამოჰყვა და შემორჩა მოკლე ბეწვი, რომლის მოვლა ძალზე ადვილია. უფრო გრძელი ბეწვი ყინულს მიიკრავდა ისეთ სუსხიან ზამთარში, როგორიც მის მშობლიურ კანადაში იცის.
ისინი დღესაც ბევრნაირ დავალებას ასრულებენ: მეგზურობას უწევენ უსინათლო ადამიანებს და ეხმარებიან პოლიციელებს. სანდო, დამჯერი, ადვილად გასაწვრთნელი ლაბრადორ რეტრივერები მეტად მეგობრულები არიან და შესანიშნავად ექცევიან ბავშვებს. ითხოვენ ადამიანებისგან ყურადღებას, უხარიათ, როცა თავს ოჯახის წევრად გრძნობენ. ლაბრადორ რეტრივერის სწორი, მოკლე და ორმაგი ბეწვი ადვილი მოსავლელია. რეგულარულად დავარცხნეთ და გამოხშირეთ მაგარი ჯაგრისით, მაგრამ თივთიკი არ დაუზიანოთ. აბანავეთ ან გაწმინდეთ მშრალი შამპუნით მხოლოდ აუცილებლობის შემთხვევაში.
კეთილი, მეგობრული თვალები მუდამ თქვენდამი კარგ განწყობას, გონიერებასა და სიფხიზლეს გამოხატავს. შავ და ყვითელ ლაბრადორებს აქვთ ყავისფერი თვალები, ხოლო შოკოლადისფერებს – მუქი თაფლისფერი ან ყავისფერი.
ფეხები
წინა ფეხები ძლიერი, დაკუნთული და პროპორციული, უკანა ფეხები ფართო, დაკუნთული და კარგად განვითარებული.
კუდი
სქელი და მრგვალი კუდი ბოლოში წვრილდება; ადარებენ წავის კუდს.
ბეწვი
ხშირი და წყალგაუმტარი, მთლიანად შავი, ყვითელი, კრემისფერი, ოქროსფერი ან შოკოლადისფერი, ზოგჯერ მკერდზე თეთრი ლაქებით.
თათები
ძლიერი და კომპაქტური, შესამჩნევად ამობურცული თითებითა და კარგად განვითარებული ბალიშებით.
ტანი
ლაბრადორ რეტრივერს შედარებით მოკლე ტანი და საშუალო სიგანის გულმკერდი აქვს. ასევე, აქვს ძლიერი, ღონიერი ფიზიკური სამუშაოსთვის, განსაკუთრებით ცურვისათვის შესაფერისი აღნაგობა.
სახე
აქვს საოცრად მიმზიდველი სახე; განიერი თავი ძლიერი ყბებით.
თვალები
შავ და ყვითელ ლაბრადორებს ყავისფერი თვალები აქვთ, შოკოლადისფრებს კი – ყავისფერი ან მუქი თაფლისფერი.
ცხვირი
ფართო, კარგად განვითარებული; შავ და ყვითელ ლაბრადორებს შავი ცხვირი აქვთ, შოკოლადისფრებს – ყავისფერი. ცხვირის ფერი ასაკის მატებასთან ერთად შეიძლება გაფერმკრთალდეს.
ეს უნივერსალური მონადირე ჯიში შეიძლება იყოს: ყვითელი (ოქროსფერ-კრემისფერი), შოკოლადისფერი და შავი. ლაბრადორ რეტრივერს წყლის თანდაყოლილი სიყვარული აქვს, ამიტომაც მას თავდაპირველად იყენებდნენ მეთევზეები, რომლებსაც ეს ძაღლი ბადის ამოწევაშიც ეხმარებოდა და სრიალა თევზებსაც იჭერდა.
შემგუებლობა
ლაბრადორის პოპულარობა, ნაწილობრივ მისი ლამაზი ექსტერიერით აიხსნება, მაგრამ უფრო მნიშვნელოვანი და სარწმუნო მიზეზია ამ ჯიშის შემგუებლობა და ადამიანების გვერდით ხალისით მუშაობა. მათ იყენებენ მრავალი ამოცანის შესასრულებლად: მიწისძვირის შემდეგ ნანგრევებში ჩამარხულთა საპოვნელად, აეროპორტებსა და სხვა ადგილებში ნარკოტიკებისა და ასაფეთქებელი საშუალებების მისაგნებად. მისი წვრთნა საკმაოდ მარტივია, რადგან ძალზე დამჯერი ჯიშია.
მონაცემები
წარმოშობა - ნიუფაუნდლენდი
მთავარი დანიშნულება - მარხილის მზიდავი
ტემპერამენტი - მოსიყვარულე, სანდო
სიც. ხანგრძლივობა - 10-12 წელი
მოვლა - რეგულარული ვარცხნა
ვარჯიში - მუდმივი, ენერგიული
მოდარაჯე - კარგი
ხვადი
56-61 სმ.
27-34 კგ.
ძუ
53-58 სმ.
25-32 კგ.
ყურადღება!
მოერიდეთ მათთვის ზედმეტი საჭმლის მიცემას, რადგან ძალზე სუქდებიან და ზარმაცდებიან.
ხშირად აქვთ მენჯ-ბარძაყის სახსრის დისპლაზია და თვალის დაავადებები.
