როგორც "ინტერპრესნიუსს" რეგულირების სააგენტოს ფარმაცევტული საქმიანობის დეპარტამენტის რეგისტრაცის სამმართველოს უფროსმა ნაილი შენგელიძემ განუცხადა, ცხოველებისა და ადამიანებისთვის განკუთვნილი სამკურნალო საშუალებების რეგულაციების განმახორციელებელი ორგანო სხვადასხვაა. მისივე თქმით, ადამიანებისთვის საჭირო სამკურნალო საშუალებების რეგულაციებს ჯანდაცვის სამინისტრო ახორციელებს, ცხოველებისთვის – სოფლის მეურნეობის სამინისტრო.
ნაილი შენგელიძე მიიჩნევს, რომ სამინისტროს მიერ დღეს გატარებული ღონისძიება ეხება ადამიანებისთვის გამოყენებულ პროდუქტებს. მისივე თქმით, პროექტის ამუშავება ვეტერინარულ სამსახურს არანაირ პრობლემას არ უქმნის.
მისივე განმარტებით, კანონმდებლობა დღეს საშუალებას იძლევა, რომ ადამიანებისთვის გამიზნული კლინიკები სათანადო ხელშეკრულებების საფუძველზე საბითუმო შესყიდვებს ახორციელებენ ბითუმ-რეალიზატორებისგან.
"ვეტერინარულ კლინიკებსაც შეუძლიათ იმავე პროცედურების ჩატარება. მათ არ სჭირდებათ საამისოდ არავითარი რეცეპტი. ეს იქნება საბითუმო შესყიდვები და თავიანთი ვეტერინარული საექიმო მომსახურების შემადგენლობის ნაწილი და შემდგომ მათი გამოყენება. ყოველ შემთხვევაში, ადამიანებისთვის ეს პრობლემას არ ქმნის", – აღნიშნა ნაილი შენგელიძემ.
მისივე ინფორმაციით, საქართველოს კანონმდებლობით აფთიაქებს ეკრძალებათ მეორე ჯგუფს მიკუთვნებული ფარმაცევტული პროდუქტის ურეცეპტოდ გაცემა და რაიმე დაშვებები ამ თვალსაზრისით კანონმდებლობაში არ არის. როგორც სამმართველოს უფროსმა განმარტა, ვეტერინარული საშუალებები კანონმდებლობით გამიჯნულია ადამიანებისგან და ამის ერთმანეთში არევა არ შეიძლება. მისივე თქმით, კანონმდებლობამ ეს ყველაფერი სოფლის მეურნეობის სამინისტროს დააკისრა. ჯანდაცვის სამინისტროს რეესტრში არსებული ნუსხა მხოლოდ ადამიანებში გამოსაყენებელ მედიკამენტებს ეხება, რადგან კანონმდებლობით პროდუქცია დიფერენცირებულია.
ნაილი შენგელიძე მიიჩნევს, რომ პირველი სექტემბრიდან პროექტის ამუშავება არანაირ პრობლემას არ შეუქმნის ვეტერინარულ სამსახურებს.
"საბითუმო შესყიდვებს გააკეთებენ უშუალოდ ვეტერინარული კლინიკები ან დამოუკიდებელი სუბიექტები", – აღნიშნა ნაილი შენგელიძემ.
იხილეთ ასევე: "ჯანდაცვის სამინისტროში მიიჩნევენ, რომ ახალი რეგულაციები ვეტერინარულ სამსახურებს პრობლემებს არ შეუქმნის"